Mbunge wa Jimbo la Itigi, Yohana Msita, amewashukuru na kuwapongeza watumishi wa Chama Cha Mapinduzi (CCM) Wilaya ya Manyoni kwa kazi kubwa na yenye tija wanayoendelea kuifanya katika kukiimarisha chama na kuhudumia wananchi.
Mbunge Msita ametoa pongezi hizo leo Januari 09, 2026, wakati wa ziara yake ya kutembelea Ofisi za CCM Wilaya ya Manyoni, ambapo alipata fursa ya kuzungumza na watumishi pamoja na viongozi wa chama hicho.
Akizungumza nao, Mbunge huyo aliwatia moyo watumishi kuendelea kufanya kazi kwa bidii, uadilifu na mshikamano, akisisitiza kuwa mchango wao ni nguzo muhimu katika kuhakikisha sera na Ilani ya Uchaguzi ya CCM zinaendelea kutekelezwa kwa ufanisi katika ngazi za wilaya na jamii kwa ujumla.
Aidha, Mbunge Msita aliwahakikishia watumishi hao ushirikiano wa karibu kutoka kwake kama Mbunge wa Jimbo la Itigi, akibainisha kuwa yuko tayari kushirikiana nao wakati wote katika kutatua changamoto zinazojitokeza na kusukuma mbele agenda za maendeleo kwa maslahi ya wananchi.
Kwa upande wao, watumishi wa CCM Wilaya ya Manyoni walipata nafasi ya kueleza mafanikio na changamoto wanazokutana nazo katika utekelezaji wa majukumu yao ya kila siku. Mbunge huyo alisikiliza kwa makini hoja zao na kuahidi kuzifikisha changamoto hizo katika ngazi husika kwa hatua zaidi.
Ziara hiyo imeelezwa kuwa chachu ya kuongeza morali, mshikamano na ari ya kazi miongoni mwa watumishi wa CCM Wilaya ya Manyoni, huku wakiahidi kuendelea kulitumikia chama kwa bidii, uaminifu na uzalendo kwa maslahi mapana ya wananchi.
Na Abdul Bandola Singida
0 Comments