Akizungumza wakati wa zoezi la tathmini ya kisiasa na kiuchumi linaloendelea ndani ya chama, Bw. Lwanji alisema maendeleo hayawezi kupatikana bila kuwa na wananchi wenye afya njema, elimu bora na mazingira yanayowezesha uzalishaji.
Alieleza kuwa CCM imeendelea kufanya tathmini ya utekelezaji wa shughuli za kisiasa na maendeleo kwa lengo la kupima mafanikio yaliyopatikana, kubaini changamoto na kuweka mikakati ya kuboresha utendaji katika ngazi zote za uongozi.
Kwa mujibu wa Bw. Lwanji, tathmini hiyo inaendelea kufanyika kuanzia ngazi ya mitaa na vijiji, kata, wilaya hadi mkoa, ikiwa ni sehemu ya maandalizi ya tathmini ya jumla ya utekelezaji wa shughuli za chama katika kipindi cha miaka 50. Alisema utaratibu huo unalenga kuimarisha uwajibikaji, ushirikishwaji wa viongozi na wanachama pamoja na kuongeza ufanisi katika utekelezaji wa majukumu ya chama.
"Tathmini hii inatupa nafasi ya kuangalia tulikotoka, tulipo na tunapokwenda. Lengo ni kuhakikisha tunajenga taasisi imara inayojibu mahitaji ya wananchi na kuendelea kusimamia maendeleo ya kijamii na kiuchumi," alisema Bw. Lwanji.
Aidha, alisema sekta ya afya inaendelea kuwa miongoni mwa maeneo yenye mchango mkubwa katika maendeleo ya taifa, kwa kuwa wananchi wenye afya bora wana uwezo mkubwa wa kushiriki katika shughuli za uzalishaji, biashara, kilimo na utoaji wa huduma mbalimbali.
Katika Mkoa wa Singida, viongozi wa CCM wameendelea kusisitiza umuhimu wa kushirikiana na Serikali katika kuimarisha huduma za afya, elimu, miundombinu na sekta nyingine za maendeleo, wakiamini kuwa uwekezaji katika huduma za msingi unachochea ukuaji wa uchumi na kuboresha ustawi wa wananchi.
Zoezi la tathmini linaendelea katika ngazi mbalimbali za chama, huku likitarajiwa kutoa mapendekezo yatakayosaidia kuimarisha mipango ya maendeleo na utekelezaji wa sera kwa manufaa ya wananchi wa Mkoa wa Singida na Tanzania kwa ujumla.
Na Abdul Ramadhani Tanzania
0 Comments