RABIA AMESIFU JUHUDI ZA RAIS SAMIA KUITANGAZA TANZANIA KIMATAIFA

Katibu wa Halmashauri Kuu ya CCM Taifa, Idara ya Mambo ya Siasa na Uhusiano wa Kimataifa (SUKI), Rabia Abdalla Hamid, amempongeza Rais wa Jamhuri ya Muungano wa Tanzania, Dkt. Samia Suluhu Hassan, kwa juhudi mbalimbali zinazolenga kuitangaza Tanzania kimataifa na kuimarisha uhusiano wa nchi na mataifa mengine.

Rabia ameyasema hayo Septemba 24, 2026, wakati akizungumza na makundi mbalimbali ya wakazi wa Singida katika Kikao cha Majadiliano na Mahusiano kilichofanyika katika Ukumbi wa Chuo cha Maji, mjini Singida.

Amesema juhudi za Rais Samia katika kukuza diplomasia na mahusiano ya kimataifa zimeendelea kuiweka Tanzania katika nafasi ya kutambulika zaidi kwenye medani ya kimataifa.

Kwa mujibu wa Rabia, Tanzania imeendelea kujenga mahusiano na mataifa mbalimbali kupitia ushirikiano wa kidiplomasia, huku akieleza kuwa juhudi hizo zimekuwa sehemu ya kuimarisha taswira ya nchi katika jumuiya ya kimataifa.

ATOA PONGEZI KWA JUHUDI ZA KUIMARISHA MAHUSIANO

Rabia pia ameeleza kuwa Rais Samia amekuwa akisisitiza umuhimu wa amani, upendo na mshikamano katika jamii, sambamba na utekelezaji wa mipango mbalimbali ya maendeleo inayolenga kumfikia Mtanzania katika maeneo tofauti.

Amesema uhusiano mzuri kati ya Tanzania na mataifa mengine una nafasi katika kufungua fursa za ushirikiano katika maeneo mbalimbali, ikiwemo maendeleo ya kiuchumi na kijamii.

AITAMBUA MIKOPO YA ASILIMIA 10

Katika kikao hicho, Rabia ametambua pia mchango wa mikopo ya asilimia 10 inayotolewa na Halmashauri kwa makundi ya wanawake, vijana na watu wenye ulemavu.

Amesema mikopo hiyo imekuwa miongoni mwa hatua zinazolenga kuwawezesha wananchi kupata mitaji na kuanzisha au kuendeleza shughuli za kiuchumi.

Kwa mujibu wa Rabia, upatikanaji wa mitaji kupitia mikopo hiyo umewezesha baadhi ya wananchi kuongeza shughuli zao za uzalishaji na kujenga vyanzo vya kipato.

MLATA APONGEZA KIKAO CHA MAJADILIANO

Kwa upande wake, Mwenyekiti wa CCM Mkoa wa Singida, Martha Mlata, amepongeza ziara ya Rabia ya kukutana na makundi mbalimbali ya wakazi wa Singida.

Mlata amesema kikao hicho ni sehemu muhimu ya kujenga mawasiliano na mahusiano kati ya viongozi na wananchi, akikitaja pia kuwa ni ubunifu katika kuwakutanisha wadau mbalimbali na kujadili masuala yanayowahusu.

Kikao hicho kimewakutanisha makundi mbalimbali ya wakazi wa Singida kwa lengo la kujenga majadiliano na kuimarisha mahusiano katika jamii.

Na Abdul Ramadhani Singida Tanzania

TUANDIKIE MAONI YAKO HAPA CHINI

Je, wewe ni Mfanyabiashara na Unatamani Kutangaza Bidhaa Zako Kupitia Tovuti/Blog Yetu? Tafadhali, wasiliana nasi kupitia bandolaonline@gmail.com au WhatsaApp: + 255 766 365 560