Akizungumza wakati wa Sherehe za Wahijiu Duniani zilizofanyika Nali Siuyu, Mkoa wa Singida, Mgonto amesema mila na desturi ni sehemu muhimu ya utambulisho wa jamii na zinapaswa kulindwa na kuendelezwa kwa kuzingatia maslahi ya kizazi cha sasa na kijacho.
Amesema jamii yenye kuheshimu mila, desturi na maadili yake hujenga mshikamano, kuheshimiana na kuimarisha mahusiano miongoni mwa wananchi.
Atoa wito wa kulinda amani
Mbali na suala la mila na desturi, Mgonto amesisitiza umuhimu wa kulinda na kudumisha amani katika jamii, akieleza kuwa amani ni msingi muhimu wa maendeleo ya mtu mmoja mmoja, jamii na taifa.
Amesema bila amani hakuna shughuli za kijamii, kiuchumi na kimaendeleo zinazoweza kufanyika kwa ufanisi.
“Jukumu la kulinda amani ni la kila mmoja wetu, si la kumuachia mtu mmoja. Tunapaswa kuwa sehemu ya kulinda utulivu wa jamii zetu,” amesema Mgonto.
Aidha, amewataka wananchi kuwa makini na kuchukua hatua zinazofaa pale wanapoona dalili zinazoweza kuhatarisha amani na utulivu katika maeneo yao, huku wakizingatia sheria na taratibu zilizowekwa.
Wananchi wakumbushwa kujiandaa na mvua
Katika hatua nyingine, Chief Thomas Mgonto amewakumbusha wananchi kuendelea kuchukua tahadhari na kujiandaa kukabiliana na mvua zinazotarajiwa kunyesha.
Amesema maandalizi ya mapema ni muhimu katika kupunguza athari zinazoweza kujitokeza kutokana na mvua, hivyo wananchi wanapaswa kuzingatia taarifa na ushauri kutoka kwa mamlaka husika.
Amewataka wananchi kuhakikisha mazingira yao yanakuwa salama, hususan maeneo yanayoweza kuathiriwa na maji mengi, huku akisisitiza umuhimu wa ushirikiano katika kukabiliana na changamoto zinazoweza kujitokeza.
Sherehe hizo zimekuwa sehemu ya kuwakutanisha wananchi katika kuenzi utamaduni, mila na desturi, pamoja na kuimarisha mshikamano na mahusiano ndani ya jamii.
0 Comments