Hali hiyo ilijitokeza
baada ya kukamata mifuko 30 ya sukari inayodhaniwa kuwa ni ya magendo iliyokuwa
imefichwa kwenye moja ya nyumba iliyopo
mjini Holili.
Inaelezwa na mashuhuda
wa tukio hilo limeotokea leo Januari 12, 2024 kuwa maofisa hao waliokuwa
wameambatana na askari polisi walipotaka kuchukua sukari hiyo, walizuiwa na
wafanyabiashara hao ambao ni wanawake.
Kutokana na hilo,
kuliibuka mvutano baina yao, huku maofisa hao wakizingirwa na wananchi
walioleta vurugu wakishirikiana na wafanyabiashara.
Vurugu hizo zinaelezwa
zilitishia kuwapo uvunjivu wa usalama, hivyo askari walilazimika kutumia mabomu
ya machozi na risasi za moto zilizorushwa hewani ili kuwatawanya.
Imeelezwa
wafanyabiashara wametumia maji kunawa nyuso zao
baada ya mabomu ya machozi kufyatuliwa.
Pia wametumia nyembe
kuchana mifuko ya sukari na kuimwagia mafuta ya taa, ili kuiteketeza kwa moto.
Baada ya maofisa hao
pamoja na polisi kuwadhibiti wafanyabaishara hao, imeelezwa waliondoka na
mifuko minane ya sukari, huku 12 imeachwa kwa wafanyabiashara hao.
Katika eneo la tukio,
gazeti hili limeshuhudia mabaki ya sukari na
makasha ya nyembe yakiwa yametapakaa kwenye eneo la nyumba ilipokutwa
mifuko hiyo.
Mmoja wa wapangaji
katika nyumba hiyo, ambaye hakutaka jina lake litajwe kwenye chombo cha habari,
amesema wakiwa nyumbani hapo, maofisa hao walivamia na kuingia kwenye moja ya
chumba cha kuhifadhi sukari za wafanyabiashara hao na kutaka kuondoka nayo
ndipo walipopiga kelele na kuzua taharuki.
"Hawa
wafanyabiashara walipochukuliwa sukari yao walipiga kelele na watu walifika wa
kutosha hapa, hawa wafanyabaishara hawakutaka sukari yao ichukuliwe kukaibuka
vurugu,” amesema.
"Sukari mnayoina hapa imemwagika ni hawa wafanyabiashara wameichanachana ili kila mtu akose na walitaka kuimwagia mafuta ya taa," amesema.
Alipotafutwa Meneja wa
TRA Mkoa wa Kilimanjaro, James Jilala, amesema yupo mkoani Arusha, hivyo kumtaka mwandishi wa habari
kumtafuta mkuu wa kituo cha forodha Holili, Mohammed Tukwa kwa ajili ya
ufafanuzi wa jambo hilo.
"Sina taarifa ya
tukio hilo, niko nje ya mkoa, naomba mtafute ‘incharge’ wa kituo cha forodha
Holili kwa ufafanuzi zaidi," amesema Jilala.
Alipotafutwa Tukwa,
amesema yupo nje ya kituo hicho, hivyo atafutwe mkuu wa kitengo cha ukamataji
magendo mkoani, Edmund Lubinza, amekiri kuwapo tukio hilo akisema atalitolea
ufafanuzi kesho, Januari 13, 2024.
"Taarifa ninayo,
bado wanaendelea na kazi wakirudi ofisini nitapata ripoti.
“Huyu aliyeendesha zoezi hili ana nafasi ya kuongelea kitu kilichofanyika, siwezi kusema chochote mpaka nipate taarifa kutoka kwao, naomba nifuatili ," amesema Lubinza.
0 Comments