Kamanda wa Polisi wa Kanda Maalum ya Dar es Salaam, Jumanne Muliro, amesema kuwa mafanikio ya diplomasia ya uchumi yanategemea kwa kiwango kikubwa uwepo wa amani, usalama na utulivu nchini.
Akizungumza kuhusu umuhimu wa mazingira salama katika kukuza uchumi, Kamanda Muliro amesema Tanzania imeendelea kuvutia viongozi wa kimataifa, wawekezaji na wafanyabiashara kutokana na hali yake ya amani na utulivu inayodumu kwa muda mrefu.
Amesema usalama ni nguzo muhimu inayowezesha shughuli za kiuchumi kufanyika kwa ufanisi, huku akibainisha kuwa bila usalama ni vigumu kufanikisha biashara, uwekezaji na maendeleo ya kijamii na kiuchumi.
“Usalama ni mtaji muhimu wa uchumi. Bila usalama hakuna biashara, hakuna uwekezaji wala maendeleo. Ni jukumu la kila mwananchi kuendelea kuilinda amani ya nchi yetu,” amesema Kamanda Muliro.
Aidha, amesisitiza umuhimu wa wananchi kushirikiana na vyombo vya dola katika kudumisha amani na utulivu, akieleza kuwa mazingira salama yanachangia kuongeza imani kwa wawekezaji wa ndani na nje ya nchi.
Kauli hiyo inakuja wakati Tanzania ikiendelea kuimarisha mahusiano ya kidiplomasia na mataifa mbalimbali duniani. Miongoni mwa matukio muhimu yanayotarajiwa ni ziara ya Rais wa Namibia nchini Tanzania, ambayo inalenga kuendeleza ushirikiano wa kihistoria kati ya mataifa hayo mawili.
Wachambuzi wa masuala ya uchumi wanaeleza kuwa ziara hiyo inaweza kufungua fursa mpya katika sekta mbalimbali, ikiwemo biashara, uwekezaji, utalii, elimu na maendeleo ya kijamii.
Ziara hiyo pia inatarajiwa kuimarisha zaidi uhusiano wa kirafiki na ushirikiano wa kiuchumi kati ya Tanzania na Namibia, huku ikichochea ukuaji wa biashara na uwekezaji kwa manufaa ya wananchi wa nchi zote mbili.
Kwa ujumla, ujumbe wa Kamanda Muliro unaonesha wazi kuwa amani na usalama vinaendelea kuwa msingi muhimu wa maendeleo ya uchumi, ustawi wa wananchi na kuvutia fursa za uwekezaji nchini Tanzania.
Na Abdui Ramadhani Tanzania
0 Comments