Mnamo tarehe 27 Julai, ziara hiyo ilifika Kata ya Tuntu, ambapo Mbunge Mgonto alitekeleza shughuli mbalimbali zilizogusa sekta za elimu, michezo, uongozi wa kijamii na maendeleo ya wananchi.
Akiwa katika shule ya sekondari ya kata hiyo, Chief Mgonto aliungana na walimu katika mchakato wa ufundishaji kwa kufundisha somo la Hisabati kwa wanafunzi wa Kidato cha nne. Hatua hiyo ilionyesha kuwa jukumu la kuboresha elimu halibaki kwa walimu pekee, bali linahitaji ushiriki wa viongozi, wazazi na jamii kwa ujumla.
Baada ya kipindi hicho, alifanya mazungumzo na walimu pamoja na wanafunzi, akisisitiza umuhimu wa nidhamu, bidii katika masomo na matumizi bora ya muda ili kuongeza kiwango cha ufaulu na kuwaandaa vijana kuwa nguvu kazi yenye tija kwa taifa.
Katika kuendelea kuhamasisha maendeleo ya kijamii, Chief Mgonto alitoa mchango wa fedha kwa ajili ya ujenzi wa Ofisi ya Kijiji, akionesha kuunga mkono jitihada za wananchi za kuboresha miundombinu ya utawala na huduma kwa jamii. Mchango huo unaendelea kuhamasisha ushiriki wa wananchi katika miradi ya maendeleo inayotekelezwa kwa nguvu zao wenyewe.
Kwa upande wa michezo, Mbunge huyo alikabidhi mipira kwa timu mbalimbali za Kata ya Tuntu ikiwa ni sehemu ya kuhamasisha michezo kama nyenzo ya kujenga afya, kukuza vipaji vya vijana na kuimarisha mshikamano wa kijamii.
Ziara hiyo ilihitimishwa kwa kikao cha mazungumzo na wazee wa kata hiyo, ambapo Chief Mgonto alisikiliza maoni, ushauri na changamoto mbalimbali zinazowakabili wananchi. Mazungumzo hayo yalidhihirisha falsafa ya uongozi unaoweka wananchi katikati ya maamuzi ya maendeleo.
Kwa mtazamo wa maendeleo, programu ya "Skonga Mtaa kwa Mtaa" inaendelea kujengwa juu ya nguzo kuu nne ambazo ni elimu, maendeleo ya jamii, michezo na ushirikishwaji wa wananchi. Kupitia ziara hizi, wananchi wanapata fursa ya kuwasilisha changamoto zao moja kwa moja kwa mwakilishi wao, huku viongozi wa jamii wakishiriki kutafuta suluhisho la pamoja.
Ziara ya Kata ya Tuntu imeendelea kuonesha dhamira ya Chief Thomas Mgonto ya kuunganisha uongozi na wananchi kwa vitendo, kwa kuamini kuwa maendeleo endelevu yanapatikana pale ambapo viongozi wanakuwa karibu na wananchi, wanasikiliza mahitaji yao na kushiriki katika utekelezaji wa suluhisho.
Abdul Ramadhani Tanzania
0 Comments