KIHONGOSI AWEKA JIWE LA MSINGI OFISI YA CCM KIMANZICHANA, ACHANGIA SH MILIONI 5

KATIBU wa Halmashauri Kuu ya Taifa (NEC) ya Chama Cha Mapinduzi (CCM), Itikadi, Uenezi na Mafunzo, Kenani Kihongosi, ameweka jiwe la msingi la ujenzi wa ofisi ya CCM Kata ya Kimanzichana Kusini, wilayani Mkuranga, mkoani Pwani, na kuchangia Sh milioni tano kwa ajili ya kukamilisha ujenzi huo.

Ujenzi wa ofisi hiyo unatarajiwa kugharimu jumla ya Sh milioni 34 hadi kukamilika kwake, huku kazi za ujenzi zikiwa zimefikia hatua ya upigaji wa sakafu.

Akizungumza na wananchi wakati wa ziara yake wilayani Mkuranga, leo Oktoba 18, 2026, Kihongosi ameipongeza CCM Kata ya Kimanzichana Kusini kwa juhudi za kujenga ofisi hiyo, akisema hatua hiyo inalenga kuimarisha shughuli za chama katika ngazi ya kata.

Aidha, amesema Wilaya ya Mkuranga imepiga hatua katika maendeleo ikilinganishwa na miaka ya nyuma, akitaja mabadiliko ya makazi ya wananchi na upatikanaji wa huduma za kijamii.

Amesema Serikali ya CCM inayoongozwa na Rais Dkt. Samia Suluhu Hassan imeendelea kutekeleza miradi mbalimbali ya maendeleo inayolenga kuboresha maisha ya wananchi wa Mkuranga, ikiwemo huduma za umeme, maji na afya kupitia hospitali ya wilaya, vituo vya afya na zahanati.

“CCM itaendelea kuwa chama kinachoongoza kwa sababu ni chama kinachotekeleza ahadi zake. Kimeahidi kuleta maendeleo kwa wananchi na kimeendelea kuyatekeleza,” amesema Kihongosi.

Ameongeza kuwa maboresho katika sekta ya afya yamepunguza changamoto ambazo wananchi, hususan wanawake wajawazito, walikuwa wakikabiliana nazo walipokuwa wakitafuta huduma za kujifungua.

TUANDIKIE MAONI YAKO HAPA CHINI

Je, wewe ni Mfanyabiashara na Unatamani Kutangaza Bidhaa Zako Kupitia Tovuti/Blog Yetu? Tafadhali, wasiliana nasi kupitia bandolaonline@gmail.com au WhatsaApp: + 255 766 365 560