Mkuu wa Mkoa wa Singida, Halima Dendego, amesema Mkoa wa Singida umeweka mikakati madhubuti ya kuhakikisha unashiriki kikamilifu katika utekelezaji wa Dira ya Taifa ya Maendeleo 2050, kwa kuendelea kuimarisha sekta za uzalishaji, huduma za jamii na uwekezaji unaolenga kuinua uchumi wa wananchi.
Dendego ameyasema hayo leo, Julai 10, 2026, baada ya kikao cha Halmashauri Kuu ya Chama Cha Mapinduzi (CCM) Mkoa wa Singida, katika mahojiano maalum na Bandola Media yaliyofanyika katika Ofisi za CCM Mkoa wa Singida.
Amesema maandalizi ya utekelezaji wa Dira ya Taifa ya Maendeleo 2050 yanahitaji ushirikiano wa Serikali, sekta binafsi, wadau wa maendeleo na wananchi ili kuhakikisha fursa zilizopo zinatumika kuongeza uzalishaji, ajira na ustawi wa jamii.
Kwa mujibu wa Dendego, Mkoa wa Singida unaendelea kuwekeza katika maeneo ya kimkakati ikiwemo kilimo, ufugaji, miundombinu, huduma za afya, elimu na kuvutia uwekezaji, hatua ambazo zitachangia kuongeza thamani ya uchumi wa mkoa na kuboresha maisha ya wananchi.
Aidha, amesisitiza umuhimu wa viongozi katika ngazi zote kuendelea kusimamia utekelezaji wa mipango ya maendeleo kwa uwazi, uwajibikaji na ufanisi, sambamba na kuhimiza wananchi kushiriki kikamilifu katika shughuli za uzalishaji.
Kuhusu kikao cha Halmashauri Kuu ya CCM Mkoa wa Singida, Dendego amesema kimekuwa jukwaa muhimu la kujadili mafanikio yaliyopatikana na kuweka mikakati ya kuendelea kuharakisha maendeleo ya kisiasa, kijamii na kiuchumi katika mkoa.
Ameongeza kuwa utekelezaji wa Dira ya Taifa ya Maendeleo 2050 unahitaji mshikamano wa wadau wote ili kuhakikisha Singida inakuwa miongoni mwa mikoa inayoongoza katika ukuaji wa uchumi, utoaji wa huduma bora kwa wananchi na maendeleo endelevu.
Mkoa wa Singida unaendelea kutekeleza miradi mbalimbali ya maendeleo inayolenga kuboresha maisha ya wananchi, huku maandalizi ya utekelezaji wa Dira ya Taifa ya Maendeleo 2050 yakitarajiwa kuongeza kasi ya maendeleo katika sekta mbalimbali za uchumi na huduma za jamii.
Na Abdul Ramadhani Tanzania
0 Comments