Mkuu wa Mkoa wa Singida, Halima Dendego, ameongoza Serikali ya Mkoa kufika katika Shule ya Seminari Diagwa iliyopo Mughanga, Kata ya Makuro, Halmashauri ya Wilaya ya Singida, kufuatia janga la moto lililoteketeza majengo mawili ya shule na kusababisha uharibifu wa miundombinu mbalimbali.
Ziara hiyo imelenga kuwapa pole wanafunzi, walimu na uongozi wa shule, pamoja na kuonesha mshikamano wa Serikali katika kuhakikisha huduma za elimu haziathiriwi na majanga.
Akizungumza na wananchi na viongozi wa shule, Mhe. Dendego amesema jambo la kufariji ni kwamba hakuna mwanafunzi aliyepoteza maisha licha ya ukubwa wa janga hilo. Amesisitiza kuwa Serikali imeanza hatua za tathmini na uchunguzi wa chanzo cha moto kupitia Kamati ya Ulinzi na Usalama ili kuzuia matukio kama hayo kutokea siku zijazo.
Katika hatua ya kutoa msaada wa dharura, Ofisi ya Mkuu wa Mkoa kwa kushirikiana na Mbunge wa Jimbo la Singida Kaskazini imetoa msaada wenye thamani ya zaidi ya Shilingi Milioni 2, ukiwemo:
- Magodoro 35
- Kilo 200 za mchele
- Kilo 100 za sukari
- Lita 40 za mafuta ya kupikia
- Sabuni
- Mashuka
Msaada huo unalenga kupunguza athari za janga hilo kwa wanafunzi walioathirika na kuhakikisha wanaendelea na masomo katika mazingira yanayowezekana.
Mhe. Dendego amesema Serikali itaendelea kushirikiana na Kanisa Katoliki, Mbunge wa Jimbo pamoja na wadau wengine kuhakikisha majengo yaliyoharibiwa yanajengwa upya kwa haraka ili kurejesha mazingira bora ya kujifunzia.
Aidha, ametoa pongezi kwa wananchi, viongozi wa Kanisa Katoliki, Jeshi la Zimamoto na Uokoaji pamoja na vyombo vya ulinzi na usalama kwa ushirikiano wao mkubwa wakati wa kukabiliana na moto huo.
Kwa upande wake, Mkuu wa Wilaya ya Singida, Mhe. Godwin Gondwe, amesema timu ya wataalamu imeanza uchunguzi wa chanzo cha moto na inatarajiwa kukamilisha taarifa yake ifikapo Julai 17, 2026.
Uongozi wa Seminari Diagwa umeeleza kuwa moto uliharibu mabweni mawili, sehemu ya kanisa, ghala na chumba cha mlezi wa mabweni. Hata hivyo, wanafunzi wote walinusurika, wakiwemo watahiniwa 42 wa Darasa la Saba, ambao wamehamishiwa katika seminari nyingine ya Kanisa Katoliki ili kuendelea na maandalizi ya mitihani yao bila kukatiza masomo.
Tukio hilo limeendelea kuonesha umuhimu wa ushirikiano kati ya Serikali, viongozi wa kuchaguliwa, taasisi za dini na wananchi katika kukabiliana na majanga na kuhakikisha huduma muhimu kama elimu zinaendelea kutolewa.

0 Comments