Msita ameyasema hayo wakati akiendelea na ziara ya kutembelea kata mbalimbali za Jimbo la Itigi, ikiwemo Kata ya Idodyandole, ambapo amepata fursa ya kuzungumza na wananchi, kusikiliza changamoto zao na kueleza hatua zinazochukuliwa katika kuzifanyia kazi.
Katika ziara hiyo, Mbunge huyo amewashukuru wananchi wa Itigi kwa kuendelea kumuamini yeye pamoja na viongozi wengine waliopata ridhaa ya wananchi katika uchaguzi uliopita.
Amesema bila wananchi kujitokeza kupiga kura na kutoa ridhaa yao, asingekuwa na nafasi ya kuwawakilisha ndani ya Bunge na kusimamia masuala yanayohusu maendeleo ya jimbo hilo.
“Changamoto ni nyingi, lakini kila siku tunazifanyia kazi. Kazi yangu ni kusikiliza wananchi, kuibua changamoto zao na kuzifikisha Bungeni ili Serikali iweze kuzitafutia ufumbuzi,” amesema Msita.
Ameeleza kuwa Serikali ya Awamu ya Sita inayoongozwa na Rais Dkt. Samia Suluhu Hassan imeendelea kutekeleza miradi na programu mbalimbali za maendeleo, huku yeye akiendelea kutumia nafasi yake ya uwakilishi kufuatilia mahitaji na changamoto za wananchi wa Itigi.
Kauli hiyo inaendana na shughuli zake za uwakilishi Bungeni, ambapo amewahi kuwasilisha hoja kuhusu changamoto za maji, afya, kilimo, wanyamapori na miundombinu katika Jimbo la Itigi.
Msita pia ametumia msemo unaosema “ukiona Kobe amepanda juu ya mti, ujue amepandishwa”, akisisitiza umuhimu wa kutambua mchango wa wananchi katika mafanikio ya viongozi waliowachagua.
Kwa upande wake, ziara hiyo imeendelea kutoa nafasi kwa wananchi kueleza changamoto zinazowakabili moja kwa moja, huku Mbunge akiahidi kuendelea kuzifuatilia kupitia vikao vya Bunge na mamlaka mbalimbali za Serikali.
“Tutaendelea kusikiliza wananchi, kuwasemea na kufuatilia utekelezaji wa majibu na ahadi zinazotolewa. Maendeleo ya Itigi yanahitaji ushirikiano wa wananchi, Serikali na viongozi wao,” amesema.
Imeandaliwa na Bandola Media.
0 Comments