Ziara hiyo imefanyika katika wilaya mbalimbali za Mkoa wa Singida, zikiwemo Manyoni, Ikungi, Iramba na Mkalama, huku Kamati hiyo ikipitia miradi mbalimbali ya maendeleo na kutathmini hatua iliyofikiwa katika utekelezaji wake.
Wilayani Mkalama, Kamati hiyo imekagua miradi mbalimbali ikiwemo mradi wa umwagiliaji unaotekelezwa katika eneo la Ishisi, ambao umelenga kuwawezesha wananchi kuongeza uzalishaji wa kilimo na kunufaika na fursa za kilimo cha umwagiliaji.
Hata hivyo, wakati wa ukaguzi huo, imebainika kuwa mradi huo ambao kwa mujibu wa maelezo yaliyotolewa ulipangwa kukamilika ndani ya kipindi cha takribani miezi 18, bado haujakamilika licha ya kuwa umepita muda mrefu zaidi ya muda uliopangwa wa utekelezaji.
Akizungumza wakati wa ziara hiyo, Mwenyekiti wa CCM Mkoa wa Singida, Martha Mlata, ametoa maelekezo ya kutaka mradi huo ukamilishwe kwa wakati, akisisitiza kuwa fedha zinazotolewa na Serikali kwa ajili ya miradi ya maendeleo zinapaswa kuleta matokeo yaliyokusudiwa kwa wananchi.
Mlata ametoa siku tisini kwa ajili ya kukamilisha hatua zinazohitajika katika mradi huo, akisisitiza kuwa utekelezaji wake haupaswi kuendelea kusuasua.
Aidha, Mwenyekiti amesema Serikali chini ya uongozi wa Rais Dkt. Samia Suluhu Hassan imeendelea kuelekeza rasilimali katika miradi yenye lengo la kuboresha maisha ya wananchi, hivyo ni muhimu fedha hizo zitumike kwa ufanisi na miradi ikamilishwe kwa wakati.
Katika hatua nyingine, Mlata ameelekeza suala la ucheleweshaji wa mradi huo kuwasilishwa kwa Mamlaka ya Kuzuia na Kupambana na Rushwa (TAKUKURU) kwa ajili ya uchunguzi na hatua stahiki kwa mujibu wa sheria, endapo kutabainika kuwepo kwa ukiukwaji wa sheria au taratibu katika utekelezaji wa mradi huo.
Kauli hiyo inaweka msisitizo katika uwajibikaji na ufuatiliaji wa matumizi ya fedha za miradi ya maendeleo, hususan miradi inayolenga kuwafikia wananchi moja kwa moja.
Kwa upande wake, Mkuu wa Mkoa wa Singida, Halima Dendego, ameahidi kuendelea kufuatilia kwa karibu utekelezaji wa mradi huo ili kuhakikisha unakamilika na wananchi wa Ishisi na maeneo yanayozunguka wanapata manufaa yaliyokusudiwa.
Dendego amesisitiza umuhimu wa usimamizi madhubuti wa miradi ya maendeleo ili kuhakikisha uwekezaji unaofanywa na Serikali unazalisha matokeo yanayotarajiwa na wananchi.
Mradi huo wa umwagiliaji unatarajiwa kuwa na mchango katika kuongeza tija katika kilimo, kupanua fursa za uzalishaji na kuwawezesha wananchi kutumia ardhi kwa uzalishaji katika misimu mbalimbali.
Ziara ya Kamati ya Siasa ya CCM Mkoa wa Singida inaendelea kuweka msisitizo katika ufuatiliaji wa miradi, uwajibikaji, thamani ya fedha na kuhakikisha wananchi wananufaika na uwekezaji unaofanywa kupitia Serikali.
Kwa mujibu wa taarifa za awali za ziara za ukaguzi wa miradi mkoani Singida, Kamati ya Siasa ya CCM Mkoa imekuwa ikifanya ufuatiliaji wa miradi ya maendeleo na kuwasilisha changamoto zinazobainika kwa mamlaka husika kwa ajili ya hatua zaidi.
Na mwandishi wetu Singida Tanzania
0 Comments