DED KIBITI ATOA ONYO KWA WATUMISHI WANAOHUSIKA NA UTOROSHAJI WA KOROSHO KIBITI

MKURUGENZI Mtendaji wa Halmashauri ya Wilaya ya Kibiti, Ramadhan Kimara, ameonya kuwa hatamvumilia mtumishi yeyote wa halmashauri atakayehusika na utoroshaji wa korosho, akisema vitendo hivyo vinaikosesha halmashauri mapato yanayostahili.

Kimara ametoa onyo hilo Oktoba 13, 2026, wakati akizungumza na Kitengo cha Mawasiliano Serikalini cha halmashauri hiyo, baada ya kukamilika kwa Mkutano wa Wadau wa Tasnia ya Zao la Korosho wilayani Kibiti.

Amesema korosho na ufuta ni miongoni mwa mazao yenye mchango mkubwa katika kuongeza mapato ya ndani ya halmashauri, hivyo ni muhimu kuimarisha usimamizi wake ili kuzuia utoroshaji na upotevu wa mapato.

“Halmashauri yetu ili iongeze mapato ya ndani inategemea mazao kama korosho na ufuta. Hivyo, kama sisi tutakuwa tunasinzia au tunakosa usimamizi mzuri na kusababisha korosho kutoroshwa, mapato yatapotea. Sitamvumilia mtumishi yeyote atakayekuwa miongoni mwa wanaotorosha korosho,” alisema Kimara.

Alifafanua kuwa atazungumza na Mkuu wa Wilaya ya Kibiti kwa lengo la kuimarisha usimamizi na doria za kudhibiti utoroshaji wa korosho, akisisitiza kuwa yuko tayari kushiriki doria hizo usiku na mchana inapohitajika.

Aidha, Kimara amesisitiza umuhimu wa wakulima kulipwa stahiki zao kwa wakati ili kupunguza malalamiko na kuimarisha imani yao katika mfumo wa biashara ya korosho.

Amewataka wakulima kutumia vizuri mapato wanayopata kutokana na mauzo ya mazao yao kwa kuzingatia mahitaji ya msingi ya familia na kuwekeza katika shughuli za maendeleo ya kiuchumi ili kuboresha maisha yao.





TUANDIKIE MAONI YAKO HAPA CHINI

Je, wewe ni Mfanyabiashara na Unatamani Kutangaza Bidhaa Zako Kupitia Tovuti/Blog Yetu? Tafadhali, wasiliana nasi kupitia bandolaonline@gmail.com au WhatsaApp: + 255 766 365 560

Post a Comment

0 Comments